حكايات شروق خالد ج1
فتح باب القاعة بعنف.
الصوت العالي خلّى الموسيقى تسكت فجأة.
كل الرؤوس اتلفتت ناحيته.
أحمد عبدالرحمن كان واقف وسط مجموعة من رجال الأعمال، ماسك كوباية عصير، وبيضحك.
أول ما شاف وش آسر، ابتسامته اختفت.
آسر وقف قدامه.
وقال بصوت هادي بشكل مخيف:
— عايز أسألك سؤال واحد يا دكتور أحمد.
أحمد حاول يضحك.
— خير يا ابني؟ إيه اللي حصل؟
آسر قرب منه خطوة.
— مين هي مريم بالنسبة لك؟
أحمد رمش كذا مرة.
— بنتي.
— بنتك؟
— طبعًا.
آسر ابتسم ابتسامة باردة.
— غريبة.
أحمد بدأ يتوتر.
— غريبة إيه؟
آسر طلع موبايله وفتحه على الملف الطبي.
— أصل بنتك عندها ملف مستشفى من وهي عندها تمن سنين.
وش أحمد اتغير.
آسر كمل:
— والملف ده فيه توقيعك.
سكتت القاعة كلها.
أحمد حاول يمد إيده ياخد الموبايل.
لكن آسر سحب إيده.
— متلمسش الموبايل.
— إنت فاهم غلط.
— أنا لسه ما سألتش.
آسر قرب منه أكتر.
— إنت كنت موجود في المستشفى يوم اتعالجت مريم؟
أحمد بلع ريقه.
— آه… بس كانت حادثة.
من آخر القاعة، نوال كانت بتسمع.
قربت بسرعة.
— آسر، إنت بتتكلم عن إيه؟
آسر ما بصش لها.
— حادثة؟
أحمد هز راسه.
— أيوه. بنت صغيرة وقعت واتصابت.
آسر ضحك ضحكة قصيرة من غير أي فرحة.
— وقعت؟
فتح صورة من الملف.
— الغريب إن التقرير بيقول إصابات متعددة في أماكن مختلفة من الجسم.
سكت لحظة.
وبعدين قال:
— وبيقول كمان إن بعض الإصابات مش متوافقة مع سقوط عادي.
وشوش الضيوف بدأت تتغير.
فريدة كانت واقفة بعيد، وشها شاحب.
— بابا…
أحمد بص لها بسرعة.
— اسكتي.
الجملة دي كانت كفاية.
آسر رفع عينه له.
— ليه قلت لها تسكت؟
أحمد اتوتر.
— عشان دي أمور عائلية.
— لا.
آسر هز راسه.
— دي مش أمور عائلية.
وبص حواليه.
— دي ج/ريمة.
صوت همهمة انتشر في القاعة.
أحمد حاول يمسك دراعه.
— آسر، اهدى وتعالى نتكلم بعيد.
آسر شال إيده بعنف.
— إنت كنت عايزني أصدق إن مريم اتربت عندك كأنها بنتك؟
— هي بنتنا!
— لأ.
صوت آسر ارتفع لأول مرة.
— الأب اللي يحمي بنته مش الأب اللي يسيبها تتعذب ويخبي الحقيقة.
أحمد اتجمد.
وفي اللحظة دي، مريم ظهرت عند باب القاعة.
كانت لابسة فستانها، وشعرها مرفوع، والموبايل في إيدها.
الكل بص لها.
آسر أول ما شافها، سكت.
مريم بصت لأحمد.
— كفاية يا بابا.
أحمد وشه احمر.
— إنتِ نزلتي ليه؟
— عشان أنا تعبت من الخوف.
صوتها كان هادي.
