حكايات شروق خالد
ده كان محمود اللي عرفته، بس الزمن غير ملامحه. أحمد جابلي كوباية مية، وقعد قصادي، وبعدها طلع صندوق خشب صغير من درج مكتبه وحطه على الترابيزة. قال: «أبويا سابلك الصندوق ده قبل ما يمـ,ـوت، وقاللي أوصلهولك بنفسي.
» بصيت للصندوق وقلت: «افتحه.» هز راسه وقال: «لأ، إنتِ اللي تفتحيه. دي حاجتك.» فتحت الصندوق، ولقيت جواه رسايل قديمة كتير، مربوطين بشريط أحمر، ومعاهم جواب عليه اسمي بخط محمود. مسكت أول جواب، ولما شفت التاريخ المكتوب عليه، حسيت إن رجلي مش شايلاني.
كان بتاريخ من أربعين سنة. فتحت الجواب وبدأت أقرا: «سعاد حبيبتي…لو الرسالة دي وصلتلك، يبقى أنا فشلت أوصلك بنفسي، ويمكن تكوني اتجوزتي وعشتي حياتك، ويمكن تكوني نسيتي اسمي أصلًا. بس أنا عمري ما نسيتك. أنا ممشيتش بإرادتي، ولا بطلت أحبك، ولا في يوم اخترت أبعد عنك.
أنا اتجبرت أسيبك، والسبب كان أبويا…» وقفت عن القراية. رفعت عيني لأحمد وقلت بصوت مبحوح: «أبوك هو اللي فرق بينا؟!» أحمد هز راسه ببطء.«أيوه.» حسيت إن الدم بيغلي في عروقي. أربعين سنة وأنا بلوم نفسي، وبقول يمكن أنا مكنتش كفاية، ويمكن هو لقى واحدة أحسن مني، ويمكن الحب اللي بينا مكنش حقيقي.
وفي الآخر، يطلع في حد كان السبب في كل ده!مسكت الجواب تاني، وكملت قراية.«أبويا هددني إنه لو اتجوزتك، هيطـ,ـردني من البيت، وهيحرمني من ميراثي، والأصعب من ده كله، إنه قاللي إنه هيأذي أبوكي في شغله، ويخليه يخسر كل حاجة.
كنت شاب ضعيف وخايف، وبدل ما أحارب عشانك، صدقت إن بعدي عنك هيحميكي. بس الحقيقة إني كنت جبان، وفضلت طول عمري أدفع تمن جبني. حاولت أوصلك بعد سنين، لكن لما عرفت إنك اتجوزتي وخلفتي، قررت أبعد. قلت لنفسي إنك تستاهلي تعيشي حياتك في هدوء، حتى لو الهدوء ده بعيد عني.
أنا مش بطلب منك تسامحيني، بس بطلب منك تعرفي إنك كنتِ الحب الوحيد اللي عمري ما قدرت أنساه.» الدموع غطت عيني، ومقدرتش أكمل. أربعين سنة من عمري ضاعت وأنا فاكرة إن الراجل ده نسيني، بينما هو كان شايل حكايتي جواه لحد آخر يوم في عمره.
لكن فجأة، لقيت ورقة تانية طالعة من بين الرسايل. كانت مكتوبة بخط مختلف، خط راجل كبير في السن. بصيت لأحمد وسألته: «دي خط مين؟» اتغيرت ملامحه، وقال: «دي رسالة من جدي… أبو محمود.» فتحتها بسرعة، وبدأت أقرا أول سطر.
